Samay Samay Ki Khalish Main, Urdu Ghazal,

Samay Samay Ki Khalish Main , Tera Malaal Rahe
Judaaiyon Mai Bhi Yoon , Aalam e Wisaal Rahe

Anaa Ki Jang Main Hum, Jeet To Gaye Lekin
Phir Uss Kay Baad, Bohot Dairr Tak Nidhal Rahe

Raah e Junoon Main , Yehi Zaad e Raah Hota Hai
Ke Justujoo Barrhe , Deewangi Bahaal Rahe

Haseen Raaten Bhi Mehkien, Tumhari Yadon Se
Karre Dino'n Main Bhi , Pal Pal Tera Khayaal Rahe

Tu Ek Baar Zaraa Kashtiyaan Jalaa To Sahi
Hai Kyaa Majaal , Ke Ek Lamhaa Bhi Zawaal Rahay.